Sports News » मैदानमै खेलाडीलाई हिर्काउँदा रोनाल्डोलाई रातो कार्ड

म्याड्रिड, माघ ११ – खेलमा राम्रो प्रदर्शन गर्न नसकेको झोकमा विपक्षी टोलीका खेलाडीलाई हिकाउँदा रियल म्याड्रिडका स्ट्राइकर क्रिस्टियानो रोनाल्डोले रातोकार्ड पाएका छन् । शनिबार स्पेनिस ला लिगा अन्र्तगत कोर्डोबाविरुद्ध खेलमा रोनाल्डोले रातो कार्ड खाएका हुन् ।

३ पटक फिफा वर्ष खेलाडी घोषित् रोनाल्डोको यो करियरमा ९ वौं रातोकार्ड हो । हिजो भएको खेलमा रोनाल्डोलाई म्यान्चेस्टर युनाइटेडका पूर्व विंगर बेबेले ओझेलमा पारेका थिए । त्यही झोंकमा उनले कोर्डोबाका डिफेन्डर एडिमारलाई लात हाने भने होजे एन्जल क्रेस्पोलाई मुक्का हानेका थिए । खेल १–१ को बराबरीमा रहँदा ८३ औं मिनेटमा रोनाल्डोले रातो कार्ड खाँदै बाहिरिए । खेलपछि उनले ट्वीट गर्दै आफ्नो व्यवहारप्रति माफी मागेका छन् । उनको यस व्यवहारका लागि उनलाई तीन खेलसम्म प्रतिबन्ध हुनसक्छ । रोनाल्डोले रातो कार्ड खाएपछि गेराथ बेलले रियललाई खेलमा बचाएका थिए । उनले अन्तिम मिनेटमा गोल गर्दै रियललाई २–१ गोलको जित दिलाए । जितसँगै रियल ४८ अंकसहित शीर्ष स्थानमा कायम रहेको छ । बार्सिलोनाभन्दा एक खेल कम खेलेको रियल एक अंकले अगाडि छ । यसअघि खेलमा कोर्डोबाले नबिल घिलासको गोलको मद्दतले खेलमा अग्रता लिएको थियो । करिम बेन्जेमाले त्यसपछि गोल गर्दै रियललाई बराबरीमा ल्याएका थिए ।