International news » हेलिकप्टर दुर्घटनामा तीन स्टार खेलाडीसहित १० को मृत्यु

अर्जेन्टिना, फाल्गुन २६ - अर्जेन्टिनामा भएको हेलिकप्टर दुर्घटनामा तीन फ्रान्सेली खेलाडीसहित १० जनाको मृत्यु भएको छ । अर्जेन्टिनाको उत्तरपश्चिम क्षेत्रमा पर्ने रियोजा राज्यमा भएको हेलिकप्टर दुर्घटनामा दुई अर्जेन्टिनी पाइलटसहित ८ जना फ्रान्सेली नागरिकको मृत्यु भएको फ्रान्सले पुष्टि गरेको छ ।
पानीजहाज चालिका फ्लोरेन्स अर्थोड, ओलम्पिक पदक विजेता लिएकी पौडीवाज कामिली मुफाट र ओलम्पिकमा खेलेका वक्सर एलेक्सीस भास्टिनको मृत्यु भएको हो । एक टीभी कार्यक्रमको सुटिङको क्रममा हेलिकप्टर दुर्घटना भएको हो ।
५७ वर्षीय अर्थोड फ्रान्सकी चर्चित पानीजहाज चालिका हुन् जसल सन् १९९० को रुट डु रुम जितेकी थिइन् । २५ वर्षीया मुफाटले एक स्वर्णसहित ओलम्पिकमा तीन पदक जितेकी छन् । त्यस्तै, २८ वर्षीय भास्टिन सन् २००८ को वेइजिङ ओलम्पिकमा पदक कास्य पदक विजेता हुन् ।
अर्जेन्टिनाका स्थानीय अधिकारीका अनुसार दुर्घटनास्थल राजधानी व्यूनो आयर्सबाट एकहजार एकसय ७० किलोमिटर टाढा छ ।
हेलिकप्टरमार्फत चर्चित सेलिब्रेटी शो ड्रप्टको सुटिङ हुँदै थियो । उक्त शोमा सेलिब्रेटीहरुलाई नौलो स्थानमा हेलिकप्टरबाट झारेर उनीहरुल खाना र बासको लागि गरेको संघर्षलाई देखाउने गरिन्थ्यो ।