भूकम्प आउनेबित्तिकै विमानस्थलको टावरमा कोही थिएनन् । त्यसैले खतरा मोलेर क्या. सिद्धार्थ र म हेलिकप्टरमा उड्यौं । 

 

त्रिभुवन अन्तर्राष्ट्रिय विमानस्थलबाट उड्ने बित्तिकै सुरुमा हामी भक्तपुरको आकाशमा पुग्यौं। भक्तपुरमा पुराना माटो जोडाइका घर गर्ल्यामगुर्लुम ढल्दै गरेको देखियो । कति घरको छाना भत्केको, केहीको जगैदेखि भत्किएर माथिल्ला तल्लाहरु थचक्क बसेको देख्यौं।

 

घरहरु भत्किएर जताततै धूलो उडेको थियो। मान्छेहरु यताउता भागदौड गरिरहेका थिए । खाली ठाउँमा भेला हुने क्रम पनि बढिरहेको थियो । केही भत्केका भग्नावशेषमा चढेर कोही पुरिएका छन् कि भनी खोजिरहेका थिए ।

 

भक्तपुरपछि ललितपुर गयौं । त्यहाँ पनि पुराना घरहरु भत्कँदै गरेको पाइयो । मंगलबारस्थित पाटन दरबार क्षेत्रका मन्दिरहरु भत्किँदै गरेको थियो । छानाहरु घरमै थचक्क बसेका थिए ।

ललितपुरपछि काठमाडौंको आकाशमा आउँदा धरहरा ढलिसहेको थियो । टुँडिखेलमा मान्छेहरु भेला हुने क्रममा थिए । बाटोभरि गाडी जाम भएको थियो ।

 

 बसन्तपुरमा दरबारहरु भत्कँदै गरेको समेत देखियो । धापासीको आकामशमा पुग्दा त्यहाँस्थित अपार्टमेन्टका भवनहरु चरक्क चर्कियो । स्वयम्भूमा रहेको गुम्बा भत्किँदै थियो ।

 

त्यस्तै काभ्रेको पनौतीमाथिको आकाशमा जाँदा पनि माटोका अधिकांश घर भत्केका थिए । नभतकेका घरका पनि छाना थिएनन् ।
 

यसपछि रसुवाको लांगटांग क्षेत्रमा उद्दारमा लागि गयौं । जाँदाजाँदै पहिरो आएर त्रिशुली नदीका ठाउँ ठाउँमा मुख थुनिएको थियो । त्रिशुलीबाट धुन्चे जाने बाटोको ठाउँमा ठाउँमा पनि भत्केको पाइयो ।

रसुवाको स्याफ्रुवेसीबाट घोडा तबेला जाने क्रममा बीचमा केही गाउँ पहिरोले बगाएको, केही गाउँ पहिरोले पुरिएर मरुभूमि जस्तो देखियो । 

 

नांगा डाँडामा मान्छेहरु यताउता गर्दै हामीलाई देखेर बचाउ बचाउ भन्दै हात हल्लाइरहेका थिए । तर हामीले उद्दार गर्न सकिने अवस्था थिएन । खराब मौसमका कारण हामी उद्दार गर्न गएको ठाउँसम्म पुग्न सकेनौं । लांगटांग गाउँ पुरै पुरिएको थियो। लांगटांग राष्ट्यि निकुञ्जभित्र रुख ढलेर सम्मै थियो ।

ु

रसुवाबाट त्रिशुली नदी हुँदै फर्कंदा पनि नदीका दायाँबायाँ भएका सबै गाउँका घर भत्केका थिए । मान्छेहरु अलपत्र परिरहेका थिए ।

 

हामीले देखेको सबै रिपोर्ट त्रिभुवन अन्तर्राष्ट्यि विमानस्थलको टावरमा निरन्तर गरिरहेका थियौं । त्यस्तै अन्य सम्बन्धित ठाउँमा पनि आवश्यक जानकारी दिएका थियौं । 

 

त्रिभुवन विमानस्थलको टावरमा कोही नभएकाले काठमाडौंमा आएका जहाजलाई हामीले नै स्कर्टिंग गरेर अवतरण गराएका थियौं । जहाज आउनेबित्तिकै विमानस्थलको अवस्था हेरेर जहाजका पाइलटलाई खबर गरेर सुरक्षित अवतरण गराउन सफल भयौं ।