नौलो खबर: यसरी चम्कँदैछ गौतमबुद्ध विमानस्थल ! (फोटो फिचरसहित)

यसरी चम्कँदैछ गौतमबुद्ध विमानस्थल ! (फोटो फिचरसहित)

स्तराेन्नतिपछि बन्ने विमानस्थलकाे स्केच

सलमान खान
१९ चैत्र, भैरहवा । बहुचर्चित राष्ट्रिय गौरवको आयोजना गौतमबुद्ध अन्तर्राष्ट्रिय विमानस्थलको स्तरोन्नतीको काम तिब्र गतिमा अगाडि बढिरहेको छ । करिव दुई महिना अगाडि निर्माण सुरु भएको विमानस्थल सन् २०१८ को सुरुवातमै सञ्चालनमा ल्याउने लक्ष्य राखिएको छ ।

अहिले विमानस्थलमा पर्ने घाघर नदी डाइभर्सन (फर्काउने) काम धमाधम भइरहेको छ । परियोजनाको कार्यालय र कर्मचारीका लागि आवास बनाउने काम पनि सँगसँगै अगाडि बढाइएको छ ।

‘घाघरा नदी डाइभर्सन गर्ने काम अहिलेसम्म करिव ८० प्रतिशत सम्पन्न भइसकेको छ’ परियोजनाका उपप्रमुख ओम शर्माले भने- ‘बर्षा सुरु हुनु अगाडि नै घाघरा नदी डाइभर्सन गर्ने लक्ष्यअनुसार काम अगाडि बढिरहेको छ ।’

नहर खन्दै डाेजरहरू ।

नदी फर्काउन करिव ३ लाख २० हजार घनमिटर माटो काटनुपर्नेमा अहिलेसम्म २ लाख ५० हजार घनमिटर भन्दा बढी माटो काटिसकिएको छ । अहिलेको गतिमा काम गर्दा जेठसम्म नदी डाइभर्सन गरिसक्ने अनुमान गरिएको छ ।

नदी डाइभर्सनलाई परियोजनाको मूख्य चूनौतीका रुपमा लिइएको थियो । ‘अहिलेको नदीलाई २.५ किलोमिटर टाढा दक्षिण क्षेत्रमा लगेर पुनः सोही नदीमा मिसाइने छ ।

अहिले नदी डाइभर्सनसँगै योजनाको प्रशासकिय भवन, ल्याब सेन्टर, स्टाफ क्वाटर समेत निर्माण भइरहेको छ । यो काम पनि जेठ महिनासम्म सम्पन्न गर्ने लक्ष्य राखिएको छ ।

नदी डाइभर्सन गर्न नयाँ बाटो बनाइँदै ।

आन्तरीक टर्मिनल भवन निर्माण पहिलो चरणमा नपरेपनि छिट्टै काम सुरु हुने बताइएको छ । यसका साथै अन्य निर्माणका कामहरु पनि एकैसाथ सुरु गरी अगाडि बढाइने छ ।

परियोजनामा स्वदेशी निर्माण सामग्रीलाई प्राथमिकतामा राखिने उपप्रमुख शर्माले बताए । तर, गुणस्तरमा भने कुनै कम्परमाइज नगर्ने बताउँदै उनले ल्याब परीक्षण पश्चात निर्माण सामग्री प्रयोग गर्ने जानकारी दिए ।

निर्माणधिन विमानस्थल क्षेत्रमा दुई दर्जन बढी इञ्जिनियरको टोलीले नियमित अनुमगन तथा निरीक्षण गरिरहेका छन् । करिव ६० वटा ट्रक र १७ वटा डोजर तथा एक्साभेटर निर्माण कार्यमा खटिरहेका छन् ।

अहिले सञ्चालनमा रहेको विमानस्थ्ल ।

२०२३ सालमा भारत सरकारको सहयोगमा निर्माण भएको गौतमबुद्ध बिमानस्थललाई स्तरोन्नती गरेर अन्तर्राष्ट्रिय स्तरको बनाउन लागिएको हो । स्तरोन्नतीको काम चीनको नर्थ वेस्ट कम्पनीले गरिरहेको छ ।

कम्पनीले भौतिक संरचना निर्माणका लागि ६ अर्ब २२ करोड ५१ लाख २० हजार दुई सय २७ रुपैयाँमा ठेक्का पाएको हो ।

एसियाली विकास बैंक (एडीबी) को सहुलियत ऋण सहयोगमा बिमानस्थल निर्माण सुरु भएको हो । परियोजना सम्पन्न गर्दा सवा ८ अर्ब रूपैयाँ खर्च हुने प्रारम्भिक अनुमान छ ।