भारतमा बेचिएकी महिला भागेर नेपाल आउन सफल
भारतमा बेचिएकी महिला भागेर नेपाल आउन सफल
चन्द्र थापा/उज्यालो । अछाम, पुस २२ - भारतको हैदराबादमा बेचिएकी अछामकी एक
महिला भागेर नेपाल फर्किन सफल भएकी छन् । ढाकु गाबिस–९ का ३१ बर्षिया
महिला यसरी भाग्न सफल भएकी हुन् । २ छोरा र १ छोरीकी आमा उनले पारिवारिक
कलहका कारण ढाकु–९ का ६० बर्षिय अमर बिष्टसँग दोस्रो विवाह गरेका थिइन् ।जिल्लाको मुली गाबिस–२ का एक व्यक्तिसँग पहिलो विवाह गरेकी उनलाई बिष्टले गएको साउनमा तेस्रो श्रीमतीका रुपमा भित्र्याएका थिए । त्यसलगतै बिष्टले ती महिलालाई भारतमा लगेर ३ लाख रुपैयाँमा बेचेर आफू नेपाल फर्किएका थिए । झण्डै १५ महिनापछि बेचिएकी महिला दलालको पंञ्जाबाट भागेर अछाम सदरमुकाम मंगलसेनस्थित जिल्ला प्रहरी कार्यालयमा पुगेपछि विवाहको नाटक गरी बेचेको घटना सार्बजनिक भएको हो ।
लामो समय कमलबजारमा होटल व्यवसाय संचालन गरेकी उनलाई छिमेकमै किराना पसल थापेर बसेका बिष्टले दैनिक उठबस पश्चात भगाएको स्थानीयबासिन्दाको भनाई छ । बेचबिखनमा संलग्न बिष्टमाथि कारबाहीको माग गर्दै प्रहरी कार्यालयमा पुगेकी उनले जिल्लास्थित महिला तथा बालबालिका कार्यालय, जिल्ला प्रशासन, अधिकारवादी महिला र केही कानून व्यवसायीसँग न्यायका लागि पहल गरिदिन आग्रह गरेकी छन् ।
उनलाई भारतमा बेचबिखन गर्नमा संलग्न भनिएका बिष्टलाई प्रहरीले पक्राउ गरेको छ । ती महिलाका पहिलो श्रीमानले नै उनलाई बेचेको भन्दै उजुरी दिने तयारीमा रहेको बेला बिष्टलाई पक्राउ गरिएको प्रहरीले जनाएको छ ।